النص الكامل لأغنية كراكيب . كلمات أبو الغيط وغناء الأمير

يسرنا نشر كلمات الشاعر رضا ابو الغيط التى سيتغنى بها المطرب السورى ( عز الدين الامير ) فى البومة الجديد والاغنية تنشر كلماتها لأول مرة .

* كراكيب *
بنعيش ف الدنيا مع الكراكيب
وافكار مهجوره بدون ترتيب
وعقول متركبه خلف خلاف
وعدو الكون عاملينه حبيب

بيطيب لنا نبقى ظلام الليل
ونحب الذل نعيش ف الويل
وبألف دليل بنشوف النور
لكن بنحب نعيش مساطيل

بنحب نكون ف الكون ده قابيل
وبتبكى عيونا اخونا هابيل
علشان ابليس شايلين تعاويز
والذنب لذيد حواليه بنميل

عايشين طواغيت بنهد البيت
وبنزرع شر ف قلب الغيط
عاوزين ارضنا خيرها يكون لنا
وازاى حزننا يطرح زغاريط

شايلين عقلنا جوا التوابيت
دفنين حلمنا وف قلب الحيط
عايشين دراويش على ملح وعيش
ع الفاهم فينا نقول ده عبيط

نتباع كراكيب كده للمحاسيب
حلمنا بيضيع .حقنا بنسيب
ويادوب بنفوق ونبص لفوق
معرفش ازاى نرجع ونخيب

طب ليه بنحب نعيش كراكيب
وبنعشق ليه ضرب المراكيب
طب ليه بنقول ع العيب ده اصول
ونقول ع المر .. قسم ونصيب؟!!

كلمات / رضا ابو الغيط

الحان وغناء : عز الدين الأمير