وباقولك ايه
ماتجيش نتلهي.بدور كوتشينه ؟
يمكن ننسي الحاصل لينا
قصدي .. علي ناس منينا
اهالينا ..
مش برضك اهالينا
_ العب
خلينا نلهي العقل وننسي ،
نتوووه ….ونغمي العين
ع الحاله الطين
عن موت الناس اليومي ف فلسطين
لعيالنا القاعدين ع القهوه .. ركن العاطلين
للقرش اللي بينقص منا
ولاعادشي مكفي حتي الجعانين
كوتشينة ايه يالئين ؟
في الدومنه .. انا غالبك نوبتين ..
_ مش لاعب
هاتفرج ع الكام اعلان الجيين
حتهزر يااخينا ؟
اهي حاجه تتوهنا من فكر غاممنا
العب احسن ..
بطل خيالات .. احلام
مش عدموا ف صباح العيد .. صدام ؟
لو عندك حتتة فرفوتة عقل تقوللي
مين مترشح للعفقه الجيه مع الايام ؟
اللعبه محبوسه
_ يخرب بيت البيت الاسود
باصص من اوسع شباك ..
ع الوطن العربي ..
ايه تاني جي علينا ؟
ماتفكر يا اخينا
_بلا دومنه بلا كوتشينه
دي مخالب الاقوي مهابه
وباقولها ف وشك .. وش
قول لملوك الشطرنج .. كش
الكل هيتتاكل بالدور
والسيف الماضي اهو ماضي بيحش ..
_ انا قايم .. من ركن معاش متبكر
منك لله .. خليتني اتعكر
مش لاعب وياك
ماتجيبش يا انت ولا مشروب
سك علي المطلوب
