المحتويات
أجمل قصيدة فى الغرام تكتبها فى عيون المدام
” من دفتر يوميات .. عاشق والسلام”
شعر: محمد عبد القوى حسن
أجمل قصيدة فى الغرام
انك تحب بدون خصام
وانك تعد نجوم حياتك
مع مراتك باحترام
وانك تهاود ليل جنونها
وانك تدير جميع شئونها
وانك كمان
ماف يوم تخونها
تفضل وفى كدة للمدام
واجمل كلام
تهدية لروحك
تكتم جروحك
وتدارى نوحك
دايما قابلها بابتسام
وتشيل حبيبتك
بكل طيبتك
فوق على جناح اليمام
وتطير بها لفوق لفوق
دايما عاملها بكل ذوق
حسسها دايما انها
ليها شوق وشوق
وان الحياة من غيرها شوك
وان الحبيبة
هى القريبة
هى المطيعة والمجيبة
وهى قمر الليل يروق
وأول نهار اليوم شروق
اوعاك تفوق من دور سذاجتك
او مرة تتذكر كرامتك
خليك كدة عاشق اهانتك
لحسن تدوق وتدوق تدوق
***
عذراً التعليقات مغلقة