‫‫‫‏‫أسبوع واحد مضت‬

مد كفوفك للفضا ..يغريك البحر بالكلام …

مد كفوفك للفضا ..يغريك البحر بالكلام ...

اسكندريه مشقوقه بالبحر

زى قلبى المشطوف بسن الموس

ينزف فراوله وريحة تفاح من حلمه المتخزن جواه

ع البيوت الرطوبه والعيون اللعوبه ومطرح لسه بينقّط حنين

غنيت بالعافيه :

(ياشمس ياشموسه

خدى دمى وغمّى عنيا

مسينى بدم عروسه..)

قبل البحر ما ينشف ويبور

فيبان الجرح وجبل الملح فى عز مانا محتاج

أدفن جسمى فى حزنه العتيق لجل ما تتبل عروقى

يارب الحظوظ ..

رشنى بنافورة هوا مايكونش متبخّر

مش فاكر من قد ايه بصيت للسما وكان القلب مفتوح

اكمنى شايف من غير عينى ما ترمش

جنيّه بجلد ناعم مشدود زى الطبل حىّ

الوش صبوح مورّد والجسم مرمر عفى

بيشتهى آدم زى الأول

الله الله على سرب الحمام الله الله

الله على سرب الحمام لما يدغدغ كتفها بمنقاره الله الله

الله الله على سر جواها الله الله

الله على سر جواها بيعلا عن صوت الهديل والزقزقه وصوت الآدان

الله الله الله

حنّان يابحر ع الغرقانين فتّان ياقلب البنيّه

الأصل ايه يا سكندريه ..

جسم ولاّ روح

حرير ولاّ مارد ولاّ تعبان

ناس بتضحك ولاّ جيش م النمل هلكان

مشوار ولاّ نفس وحدانيه بتنده ع العشيق

والقصد ريح وفيها الشقا لما العيون تبان

لما العيون تبتدى من أول اللمعان

تنادى وتهلل :

لسه ماشبعتش كلام

ماشبعتش كلام

ماشبعتش كلام لسه …

لسه   !!

لسه   !!

  أشرف عتريسمصر

 

تنويه هام: الموقع يقوم بنقل ما يتم تداولة فى الأوساط الإعلامية العربية والعالمية لتقديم خدمة إعلامية متكاملة، لذا فالموقع غير مسؤول عن صحة ومصداقية الأخبار المنشورة والتي يتم نقلها عن مصادر صحفية أخرى،كما أن المقالات المنشورة تعبر عن آراء أصحابها وليس بالضرورة عن رأي الموقع، وعليه فالموقع لا يتحمل أي مسؤولية قانونية أو أدبية وإنما يتحملها المصدر الرئيسى للخبر او كاتب المقال.

إكتب تعليقك هنا

‫شاهد أيضًا‬

عبد الرحمن يوسف يرثى خاشقجى فى قصيدة

بَرْدٌ خَريفِيٌّ على إسْطَنْبُولْ… وحَدِيثُ عُشَّاقٍ يَطُولُ، وكَيْفَ لَيْسَ يَطُولْ…