حبيتك يامنصورة .. قصيدة بالعامية المصرية

مدينة المنصورة _ مصر _ الساعة 25

ف عزبة عقل ف الحاره النفرتيتي
كبرتي يابت واتنيلتي حبيتي
مابين الكوبري ولغاية بتاع الفول
فردتي الحلم حكاياتك عشم عالطول
وفورتي قوام
وقصص الحب ف بلدنا ساعات ماكانتش ف الافلام
عشان كانت ف شارع سعد شربيني
وعلى الكورنيش
يابت اتلمي حبيني ومتتخضيش
وياما زمان ف كوبري القطر من طلخا ولحد البيت
حارات مردومه حبيبه وكم حواديت
وسكه جديده بنروحها لهدوم العيد
ايشي غوايش مكباتي
عصير المانجا وجيلاتي
وسوق لا مؤاخذه خواجاتي
ودلع ياما
نشوف الفيلم ف السيما عدن ولا
نأجر مارد أو فإن دام
ونتفسح على الهابي لاند فالضله
وخروب ميت حدر قدام
وانجش لأجل نتمشي
ولو جمعنا عشره جنيه
يجوز تفرج ونتعشي
وف العائلات يجوز ناخد كمان صوره

يابنت لذينه حبيتك…………………… وجنب الميت حدر شارع
ولا الاحلام
اخويا حكالي عن فنه الأصيل ياسلام
عن الالاتيه والمغني
وغوازي صيام
و كازينو الشجره للعشاق وللشله
وقصر ثقافه للادباء كمان يرعي
واقول الشعر وانا لسه يادوب طالعه
على السلم وبعصر ف المشاعر عصر
وقلبي النونو لسه رقيق
وشارع بنك مصرعتيق
يلم الطب ويداوي
بمليون يافطه مر فوعه
وعالحسنيه نتفرج
وكرياكو إلى كان غاوي
يبيع الخمره والبيره
ويسطل ف العيال فالعيد
فانهرب منه وبسرعه
نقابل قطر سكه حديد
وناخدلفه والشعرا على مدد البصر قاعدين
على قهوة لبن فاتحه
قلوبها وباصه عالفتارين
وبعد الفسحه والسيما
ادينا نبص عالفضه
ف سكه واسمها قديمه
كنيسه شموخها يبهرني
و لوحه قديمه للعدرا
ونلمح كل فناني الزمن دولا
حمام… وابن الطويل طارق
هشام حسونة… وشبيني
وطبعا كان عصام بركات
دي نحته ودكها سبوبه
على الكافتيريا منصوبه
سحر… ومنيرفا مزيكا
ومغني وعازفين والات
تقول نهاوند ااقول سيكا
وده. موسم بقى وحر كات
واصل المغني ده ف دمي
فا كنت بعدي مبهوره
يابنت لذينه. حبيتك. يامنصوره

شعر : نيفين الطويل _ مصر

 

اكتب تعليقك