المسحراتي الحلقة 21.. اول ما اقول الله

المسحراتي الحلقة 21.. اول ما اقول الله

شعر: محمد عبد القوى حسن

اول ما اقول الله

تحلو فى عيونى السكك

وانسى همومى وانفتح للكون

نهضه قوية ف روحى بتاخدنى

واصعد لروح الروح ونور سموات

انسى اللى حاصل من عمايل البشر

الناس بتاكل ف بعضها مساكين

مساكين غلابة مايعرفوش السر

انت ابن ادم مهما عليت ف الكون

لابد ترجع وبكل شىء هاتقر

وساعتها مش هاتفر

من عمايلك السودة

واخر مقر لك

اكيد فى النار

تسكن مع فرعون

وعمك كوهين

يسقيك هامان من يدة

كاس قطران

 

وانت ف الدنيا مش حاسس ونازل شطح

تشطح وتنطح وتاكل حقوق الخلق

سالك طريق شيطانك الاعمى

واخدك معاه لضباب وويل وهوان

حاول تفكر لحظة تتدبر

حاول ف مرة ياقاسى تكون انسان

اقتل حيوان الشر من داخلك

واطلع لكل الكون دعا كروان

تصبح بفضل الله ف عزة ونصر

انصر طريق الخير تلاقى الخير

خليها على الله اللى رازق النمل رازق الطير

ماتعولش هم القوت واعبد ف ربك

اكيد يحبك

وان حبك بقيت ف امان

 

من حبه ربه هايطلع دوغرى على الجنان

اما اللى صاحب الشيطان

مالوش عنوان

غير ف النيران اكيد هايشرب ويل مع قطران

جرب ف مرة كدة تنسى عمايلك السودة

جرب ف مرة كدة تغقد نيتك ع الخير

جرب ف مرة كدة تغسل ذنوبك

جرب كدة تقول الله

الله

الله دى كلمة جميلة وطعمها اجمل

ف وسط كل العالمين من نورها نتجمل

واحنا ولاد امة الرحمة

امة البركات

امة سماحة وخير

امة الصلوات

امة طهارة ونبل

امة الفتوحات

خليك كدة ولد شهم

وجرب البطولات

واقرى ف سيرة النبى

واقرا عن الفتوحات

واسلك طريقه السمح

واخلص النيات

 

الكون جميل

بس احنا مش شايفينه

ودرب الخير بيندة كل يوم

بس احنا مش سامعينه

ما اجملك ابن ادم وانت ف ثوب انسان

ما اجملك وانت بتوحد الرحمن

ما اجملك بتحى سنة العدنان

ما اجملك وانت بتعطف على الغلبان

ما اجملك والاجمل من داكله

انك اكيد اكيد كسبان

اكيد كسبان

لو مرة تفتح المصحف

وتحفظ القران

لو مرة تذكر ربك الرحمن

لو مرة صليت على سيدنا النبى

صاحب الطهارة والجسارة

وقائدنا للجنان

افتح لقلبك مسيرة كلها بركات

واقرأ ف سيرته الجليلة

تتملى ببركات

وغنى للطير وللكون

اجمل النفحات

وهادى الكون ببسمة

وامسح على راس الطفل اليتيم بحنان

وساعد الارمله المحتاجة

واعطيها من خير ربنا الرحمن

سبح اللهك واحمده

وحد اللهك واشكره

واتعود تكون دايما مع الحلال كسبان

ابعد عن السيئات وزود الحسنات

وقيم لربك فروضة ادى له ف الصلوات

واتحرى كل الصدق ف اعمالك

تفرح وتسعد وتلقى نور النبى جالك

هنيالك برضاه عليك

هنيالك بتحنانه

عبش بين جنانه ف طاعه وزهد

وحب وفرح وامان

خليك صبور وكافح طريقك من الشيطان

خليك وقور وسامح وابعد عن العصيان

خليك ودود واحمل اجمل صفات انسان

انسان طهور وشكور

وحامد ربه فى كل لحظه وكل ثوان

افتح دروب المجد وغنى نشيد الود

واطلع لكون الكون وقول الله

راح يملى قلبك عبيره

تسبح بين نهر نيله

ربك عظيم ادعى له

هايستجيب لدعاك

من خيره ونعمته وبركاته كتير اهداك

صحة ورزق وعقل راجح وف احسن الصور سوالك

اسمع نداء الله

امش بنور الله

اسلك ف درب الله

عمر قليبك بحبه

وحب رسول الله

واول ما اقول الله

تحلو ف عيونى السكك

وانسى همومى وانفتح للكون

رمضان كريم

والله

رمضان جميل بالله

الله الله الله

 

المسحراتي الحلقة 21.. اول ما اقول الله

قد يعجبك أيضا:

عدد ركعات القيام .. صلاة القيام كم ركعة ؟

المسحراتي الحلقة 20 .. وبتشوق

دعاء يوم الجمعة المبارك والمقبول

الساعة 25

اكتب تعليقك
تنويه هام 
الآراء المنشورة في الموقع تعبر عن آراء أصحابها ولا تعبر بالضرورة عن رأي أو توجه الموقع، كما أن الموقع يعمل على تقديم خدمة إخبارية متكاملة للقراء معتمدا على ما يتم تداوله في المواقع والصحف ووكالات الأنباء العربية والعالمية، وبذلك لا يتحمل الموقع أية مسؤولية جراء ما ينقل عن تلك المصادر.
عاجل